Оргтехника сотиб олиш учун танлов эълон қилинади
Офис техникаларини сотиб олиш учун танлов эълон қилинади
Урганч шаҳрида амалга оширилиши режалаштирилган инвестицион лойиҳа
Урганчда 66 метр баландликда давлат байроғи ўрнатилди.
Хоразм вилояти Урганч шаҳрининг Амир Темур номидаги истироҳат боғида Ўзбекистоннинг улкан байроғи ўрнатилди.
Ушбу байроқ боғ ичида жойлашган «Ёшлар маркази» олдидаги майдонга, 66 метрли флагшток учига ўрнатилган бўлиб, ўлчами 10х20 метрни ташкил қилади.
Байроқ шаҳар кўркига кўрк қўшиб, узоқ масофадан яққол кўзга ташланиб туради.
Қайд этиш керакки, бу байроқ мамлакат президенти Шавкат Мирзиёевнинг вилоятга ташрифи арафасида ўрнатилди.
Эслатиб ўтамиз, бунгача Ўзбекистондаги энг баландликдаги байроқ шу йилнинг ёзида Тошкентда, «Халқлар дўстлиги» санъат саройи олдига ўрнатилган байроқ бўлиб турганди.
Манба: kun.uz
“KIVA” – кунжут пастаси ва кунжут ҳолваси Урганчда ишлаб чиқарилади
Хоразм вилояти Урганч шаҳридаги “Splash Urganch” масъулияти чекланган жамияти кунжутни қайта ишлашга ихтисослашган.40 нафар киши меҳнат қилаётган корхонада “KIVA” ёрлиғи остида таҳин – кунжут пастаси ва кунжут ҳолваси ишлаб чиқарилмоқда.
“Қирол нонуштаси”, дея таърифланадиган таҳин – кунжут таркибида инсон саломатлиги учун зарур витаминлар кўп бўлиб, у организмдаги заҳарларни йўқотадиган озуқадир. Инсон терисини гўзаллаштириб, танани ёшартиради, иммунитетни кучайтиради. Кўз нурини равшанлаштиришда, хотирани мустаҳкамлашда, болаларнинг ақлий ривожланишида, нафас торлиги ва бронхит касалликларини бартараф этишда, жигарни тозалашда таҳиннинг фойдаси бисёр.
– Кунжутдан тайёрланган маҳсулотларни бутун дунё севиб истеъмол қилади, – дейди корхона раҳбари Руслан Қаландаров. – Жорий йилда 1000 та фермер хўжалиги билан кунжут етиштириш бўйича шартнома имзолаганмиз. Даладан келтирилган кунжут тозаланиб, пўстидан ажратилади. Замонавий ускуналар орқали корхонамизда маҳсулотга “қайта ҳаёт” берилади. Тайёр маҳсулот ички бозордан ташқари Туркия давлатига экспорт қилинмоқда. Келгусида Европа ва МДҲ давлатлари билан ҳам ҳамкорликни йўлга қўйишни режалаштирганмиз.
Жалолиддин Мангуберди мемориал боғи Хоразмнинг яна бир «ташриф қоғози» бўлади
Президентимиз Шавкат Мирзиёев ташаббуси билан Урганч шаҳри марказида Жалолиддин Мангуберди мемориал боғини барпо этиш режалаштирилган.
Давлатимиз раҳбари 30 ноябрь куни Ал-Хоразмий ва Паҳлавон Маҳмуд кўчалари кесишмасидаги ушбу майдонга ташриф буюриб, қурилиш лойиҳалари билан танишди.
Жалолиддин Мангуберди ҳайкали буюк бобомизнинг жасорати ва шону шавкатига мос маҳобатли бўлиши, унинг атрофидан нур таралиб туриши кераклигини таъкидлади.
- Бу майдонда тарихимиз намоён бўлиши, у Хоразмнинг «ташриф қоғози»га айланиши керак. Шунинг учун тарихчи олимлар билан маслаҳатлашиб, майдонни чуқур мазмунли, чиройли, жозибали қилиш зарур, - деди Шавкат Мирзиёев.
Президентимиз боғ ҳудудини кенгайтириш ва ободонлаштириш, ҳар бир элементда қадимийликни акс эттириш бўйича ўз тавсияларини берди.
Шу ерда Урганч шаҳри марказини батафсил режалаштириш, кўп қаватли уй-жойлар қуриш, иссиқлик ва ичимлик суви таъминотини яхшилашга доир лойиҳалар бўйича ҳам маълумот берилди.
Президентнинг Хоразм вилоятига ташрифи якунланди.
Манба: Ўзбекистон Республикаси Президентининг расмий веб-сайти
Шавкат Мирзиёев «Ниҳол» инновацион мактабига ташриф буюрди
Президент Шавкат Мирзиёев 30 ноябрь куни Урганч шаҳридаги «Ниҳол» инновацион мактабини бориб кўрди.
Жорий йил сентябрь ойида фаолият бошлаган ушбу нодавлат таълим муассасаси бошланғич синф ўқувчиларига ментал арифметика, инглиз ва рус тилларини чуқурлаштирилган тарзда ўргатишга ихтисослашган. Ўқувчиларнинг бўш вақтини мазмунли ташкил этиш мақсадида шахмат тўгараги ташкил этилган. Мактабга тайёрлов гуруҳлари ҳам йўлга қўйилган.
Мактабда 19 та фан хонаси, кутубхона, ошхона, спорт зали, ўқитувчилар ва ҳамшира хоналари, фаоллар зали мавжуд.
Ҳозирда инновацион мактаб 250 ўринга мўлжалланган. Эҳтиёждан келиб чиқиб яна 500 ўринли янги ўқув биноси барпо этиш режалаштирилган. Унда болалар ўқишни юқори синфларда ҳам давом эттириб, билимини мустаҳкамлаб боради.
Давлатимиз раҳбари ўқитувчилар фақат дарс бериш билан шуғулланмасдан болаларнинг дунёқаришини ўстириши, мантиқий фикрлашга ўргатиши, уларнинг руҳиятига эҳтиёткорона муносабатда бўлиши зарурлигини таъкидлади.
Мактабга автобус ва ўқувчиларга планшетлар совға қилиш бўйича топшириқ берди.
Манба: Ўзбекистон Республикаси Президентининг расмий веб-сайти
Шавкат Мирзиёев: Туристларни тарихимиз ва қадриятларимиз билан жалб қилишимиз мумкин
Президент Шавкат Мирзиёев Хива темир йўл вокзали билан “Ичан-қалъа” мажмуаси ўртасида барпо этилаётган хиёбонни кўздан кечирди. Бу ҳам давлатимиз раҳбарининг аввалги ташрифлари чоғида берилган топшириқ ижроси бўлиб, Хивага янгича қиёфа бағишлади.
Хиёбоннинг икки тарафида икки қаватли туризм объектлари қурилган. Уларнинг биринчи қаватида ҳунармандчилик устахоналари, савдо ва маиший хизмат дўконлари, иккинчи қаватида оилавий меҳмонхоналар, ресторанлар ташкил этилган. Бу хиёбон ва шохобчалар сайёҳларга қўшимча қулайлик яратиш билан бирга одамлар учун иш ўрни, даромад манбаи ҳам бўлади.
Президентимиз шу ерда Хоразм вилоятининг туризм салоҳиятини ривожлантириш, Хива шаҳрининг тарихий қисмини батафсил режалаштиришга оид лойиҳалар билан танишди.
Уларда мамлакатимизда халқаро бренддаги меҳмонхоналар бунёд этиш, савдо ва сервисни кенгайтиришга қаратилган режалар тақдим этилди.
Шавкат Мирзиёев хорижлик ишбилармонлар билан суҳбатлашиб, уларнинг инвестиция таклифлари бўйича кўрсатмалар берди.
- Ўзи бизнес нима дегани? Манфаат дегани. Ўзбекистонда туризм жуда манфаатли, истиқболли соҳа. Шунинг учун бу соҳага тадбиркорларни, инвесторларни кўпроқ жалб этиб, уларга «яшил йўлак» қилиб бериш керак, - деди давлатимиз раҳбари.
Хива яқинида кўп қаватли уйлар қуриб, шаҳарнинг тарихий қисмида яшаётган аҳолини босқичма-босқич кўчириш, қалъа ичидаги уйларни сайёҳлик объектларига айлантириш зарурлиги таъкидланди.
- Биз чет эллик туристларни қадимий тарихимиз ва қадриятларимиз билан жалб қилишимиз мумкин. Лекин Хоразмнинг, Хиванинг тарихи тўлиқ ўрганилмаган, уни таништириш бўйича тизим ҳам йўқ. Шунинг учун Хоразм тарихини энг қадимги даврдан бошлаб йилма-йил ўрганиб, одамларга содда тилда тушунтиришни йўлга қўйиш керак. Муҳим даврлар ва воқеалар, ҳар бир хон ҳаёти бўйича шоу-румлар ташкил этиб, сайёҳларни қизиқтириш зарур. Хивага келган одам катта таассурот, билим олиб кетсин, бу ерда кўпроқ қолиб вақтини мазмунли ўтказсин, деди Шавкат Мирзиёев.
Ўзбекистон Фанлар академияси, Хоразм Маъмун академияси, Туризм қўмитаси ва бошқа тегишли ташкилотларга шу бўйича топшириқлар берилди.
Президент Хоразмга келди
Ўзбекистон Президенти Шавкат Мирзиёев 29 ноябрь куни Хоразм вилоятига ташриф буюрди. Ташриф давомида ҳудуддаги бунёдкорлик ишлари, саноат корхоналари фаолияти, транспорт ва туризм инфратузилмаси, таълим ва маданият муассасалари билан танишиш режалаштирилган.
Давлатимиз раҳбари Урганч халқаро аэропортидан Шовот туманига йўл олди.
Манба: Ўзбекистон Республикаси Президентининг расмий веб-сайти
