Ўзбекистон – Қозоғистон форуми доирасида 16 та ҳужжат имзоланди
Хоразм вилоятида ўтаётган Ўзбекистон Республикаси ва Қозоғистон Республикаси ўртасида иккинчи ҳудудлараро ҳамкорлик форуми доирасида икки мамлакат ҳукумат раҳбарлари иштирокидаги ҳукуматлар делегациялари учрашуви бўлиб ўтди.
Тадбирда мамлакатларимиз ўртасида савдо-иқтисодий, сармоявий, транспорт ва коммуникация, қишлоқ хўжалиги, сайёҳлик, таълим соҳаларидаги қўшма лойиҳаларни амалга ошириш, шунингдек, ҳудудлар ўртасидаги ўзаро ҳамкорлик алоқаларини кенгайтириш, ҳудудлараро ва чегаравий ҳамкорлик, божхона, энергетика, сувдан фойдаланиш, каби йўналишлар бўйича ўзаро алоқаларни ривожлантириш истиқболлари кўриб чиқилди. Транспорт-транзит йўналишида манфаатли ҳамкорликни кенгайтириш масалаларига ҳам алоҳида эътибор қаратилди. Шунингдек, илмий-техникавий ва маданий-гуманитар ҳамкорлик масалалари муҳокама қилинди.
Учрашув якунида идоралараро, иқтисодий ҳамкорликни ривожлантириш тўғрисидаги ўзаро англашув меморандумлари, Протокол, Битим, шунингдек мавжуд келишувларни амалга ошириш бўйича Чора-тадбирлар режаси кўринишидаги 15 дан зиёд ҳужжат қабул қилинди.
Музокаралар натижасида Ўзбекистондан Иқтисодиёт ва саноат, Инвестициялар ва ташқи савдо вазирликлари, Савдо-саноат палатаси, “Ўзавтосаноат” уюшмаси, Қорақалпоғистон Республикаси, Навоий, Бухоро, Хоразм, Сирдарё, Тошкент вилоятлари ҳокимликлари, Қозоғистондан Савдо ва интеграция, Миллий иқтисодиёт вазирликлари, Мангистау, Қизил Ўрда, Оқтўбе, Кустанай, Туркистон вилоятлари, Чимкент шаҳри ҳокимиятлари вакиллари томонидан ҳамкорлик тўғрисидаги тегишли ҳужжатлар имзоланди.
Ўзбекистон Республикаси Бош вазири Абдулла Арипов ва Қозоғистон Республикаси Бош вазири Асқар Мамин Ўзбекистон Республикаси ва Қозоғистон Республикаси ўртасида II ҳудудлараро ҳамкорлик форумининг якуний декларациясини имзоладилар.
Манба: УзА
